Олны анхаарлыг татсан шүүх хурлуудын нэг нь ТЕГ- ын дарга асан Б.Хурц, Ерөнхий прокурорын орлогч прокурор асан Г.Эрдэнэбат нарын есөн хүнтэй холбоотой. Тэд төр нийгмийн зүтгэлтэн С.Зоригийн амийг хөнөөсөн хэрэгт буруутгагдан ял эдэлж буй Т.Чимгээ, Б.Содномдаржаа нарыг эрүүдэн шүүсэн хэрэгт буруутгагдаад байгаа. Шүүх хурлыг өнгөрсөн сарын 23-ны өдөр Төв аймаг дахь Сум дундын Эрүүгийн хэргийн анхан шатны шүүхэд болсон.Гэвч шүүгдэгчдийн өмгөөлөгч шүүгчдийн бүрэлдэхүүнээс татгалзах хүсэлт гаргасан учраас шүүх хурал энэ сарын 12-ны өдрийг хүртэл хойшлуулсан. Харин Төв аймгийн шүүх бүрэлдэхүүн хуралдаж, шүүгдэгч нарын гомдлыг хүлээж авахаас татгалзжээ. Тиймээс шүүх хуралд өмнөх бүрэлдэхүүн орно гэсэн үг. Шүүх хуралдааныг маш нууц учраас хаалттай хийнэ. Гэхдээ энэ хурлыг нээлттэйгээр зохион байгуулж болно гэдгийг зарим өмгөөлөгч өөрийн цахим хуудсандаа ч бичжээ.
Тухайлбал, өмгөөлөгч Б.Мэргэн “Нэгэнт улстөрчид нь хэрэгтэй хэсгүүдээ Засгийн газрын тогтоолоор ил болгочихсон. Хүсвэл цаашид ч ил болгоно. Нууц, далд байх ёстой тагнуулын туслах ажилтнуудыг ч ил болгочихсон учраас одоо бол нуугаад байх зүйл бараг үлдээгүй” гэх агуулгатай пост оруулжээ. Үнэхээр ч С.Зоригийн амийг хороосон хэрэг 1999 оноос хойш улстөрийн шоу болж, нэр дэвшигч бүр илрүүлэх талаар ярьдаг байсан.
Арайхийн илрүүллээ гэтэл дахин эрүүдэн шүүсэн гэх асуудал дэлгэгдсэн гэх зэргээс харвал энэ тавилттай жүжиг байх магадлалтай гэх хардлагыг төрүүлж байна. Түүнчлэн асуудлыг нэг мөр дуусгаж, хэргийг шийдвэрлэе гэж байгаа бол тодорхой хүрээнд ил болгох боломж хуульд байгаа бололтой. Тиймээс энэ сарын 12-нд олон хүний хувь заяаг шийдэхдээ хэрхэхийг бид харах л үлдэв бололтой.
Х.Маргад
Эх сурвалж: erennews.mn
