Хөвсгөл аймагт 2021 оны дөрөвдүгээр сараас эхлэн "Нэмэх даатгал" нэрээр иргэдийн мөнгийг татан төвлөрүүлж байсан ч эцэстээ энэ нь залилан болсон тухай тус аймгийн иргэд удаа дараа мэдээлэл хийсэн.  Харин ЦЕГ-аас тус хэргийн мөрдөн шалгах ажиллагаа явагдаж байгаа гэсэн мэдээллийг өгсөн.

Тэгвэл Хөвсгөл аймгийн иргэд өнөөдөр дахин хэвлэлийн бага хурал хийлээ. Тэд "Мөрдөн шалгах ажиллагааг сэжиглэж байна. Мөн УИХ-ын гишүүд болон сайд дарга нарыг энэ асуудлыг анхааралдаа авахыг шаардсан юм.

Энэ үеэр Д.Бямбаа “Бэлтэс мөрөн"-гийн хохирол бол сүүлийн хоёр сарын хугацаанд явагдсан. Тэрнээс өмнө байршуулсан хүмүүс бол мөнгөө өсгөж аваад л байсан байгаа юм. Гэтэл 2022 оны дөрөвдүгээр сарын 24-ны өдөр гомдол гаргасны улмаас хэрэг бүртгэлийг нээсэн. Энэ өдрөөс хойш шалгах үйл ажиллагааг аймгийн мөрдөн байцаагч н.Гантулга гэсэн хүн ахалсан. Гэвч энэ хүн нь ямар нэгэн шалгах үйл ажиллагаа явуулаагүй ээ. Мөн АТГ тус хүмүүс болон аймгийн Засаг дарга, ИТХ дарга нарыг шалгуулмаар байна гэхэд шалгахгүй байна. Монголын шүүх иргэддээ биш, эрх мэдэлтэн эсвэл хэн мөнгөтэйд үйлчилж байна. Тиймээс бид УИХ гишүүд болон хууль хүчнийхэнээс тусламж  гуйж энэ хэргийг анхааралдаа авахыг шаардаж байна” гэсэн юм.

Хохирогч С.Мягмарсүрэн “Миний хувьд гуравдугаар сард дүүгийнхээ хадгаламж, ахынхаа ноолуур зэргийн мөнгийг тус газарт өгсөн. Мөнгөө өсгөөд авах болоход тус газрын үйл ажиллагааг хаасан. Гэвч тэр хүмүүс усанд хаясан чулуу шиг алга болсон. Харин нэг хүн нь Хөвсгөлд үлдсэн. Тэр хүнийг бид өдөр шөнөгүй ээлжилж, сахиж мөнгөө авмаар байгаагаа хэлж байсан. Гэвч цагдаагийн байгуулагаас тухайн бид нарыг тухайн хүнийг барьцаалсан гэж үзээд аваад явчихсан. Мөнгөө алдсан хүмүүсийн талд биш. Мөнгө залилсан хүмүүсийн талд ажиллаж байна гэж бидний зүгээс хардаж байна” гэв.

Хөвсгөл аймгийн хэмжээнд тус компанийн дансанд 5-10 сая төгрөг байршуулаад эргүүлэн авч чадаагүй 3000 гаруй хохирогч байгаа юм. "Бэлтэс мөрөн" ХХК-ийн удирдлагууд тэтгэврийн болон хөгжлийн бэрхшээлтэй иргэдийн халамжийн мөнгийг өсгөж өгнө гэх байдлаар итгүүлэн татаж дансандаа төвлөрүүлснийг иргэд хэлж байгаа юм. Мөн энэ хэргийг одоо болтол шийдэхгүй, шалгахгүй байгааггаас харахд зохион байгуулалттай хэрэг байж болзошгүй гэж харж байгаа юм байна.