Монгол Улс 120 сая ам.долларын нүүрсээ хулгайд алдсан байж болзошгүй гэж Блүмберг агентлаг БНХАУ-тай хийсэн фьючерс гэрээг задлан шинжилсний дүнд тооцоолжээ. Тус агентлагийн тооцоолсноор, Хятадтай залгаа хил дээрх Монголын агуулахаас ойролцоогоор 385 мянган тонн нүүрс алга болсон. Монголын Засгийн газар одоогоор алдагдсан гэх нүүрсний үнийн тооцоог олон нийтэд зарлаагүй байна. Монгол Улсын Ерөнхий сайд Лувсаннамсрайн Оюун-Эрдэнэ мягмар гарагт мэдэгдэл хийхдээ ард иргэддээ эдийн засгийн нөхцөл байдал удахгүй сайжирна гэж итгүүлэхийг оролдож, БНХАУ-ын зүгээс хилийн хяналт шалгалтыг зөөлрүүлж буйг “сайхан мэдээ” гэж тодорхойлсон.
Хятад улс импортод тавьсан хязгаарлалтаа сулруулсан ч хоёр улсын худалдааг хазаарлаж буй олон хүчин зүйл бий гэж Блүмберг агентлаг онцолсон байна. Тухайлбал, Монголын төмөр зам Хятадын хил хүртэл баригдаж дуусаагүй байгаа. Үүнээс гадна Монгол Улсад төмөр замын царигийн стандарт өөр тул хил дээр ачааг нарийн царигт зориулсан вагон руу дахин ачих шаардлага гардаг гэж Блүмберг агентлаг тодруулжээ.
Үүнээс өмнө БНХАУ-ын Гадаад хэргийн яамны албан ёсны төлөөлөгч Мао Нин Оросын ТАСС агентлагийн сурвалжлагчийн асуултад хариулахдаа Монголын эрх баригчдаас хүсэлт тавивал Бээжин БНХАУ руу гаргаж буй нүүрсийг хулгайлсан гэх хэргийг шалгахад нь туслахад бэлэн гэдгээ илэрхийлсэн. Лхагва гарагт УИХ-ын спикер Гомбожавын Занданшатар УИХ нүүрсний хулгайн хэргийн шалгах ажлын хэсэг болох түр комисс байгуулна гэж мэдээлсэн билээ. Энэ хэрэг сүүлийн өдрүүдэд Монгол Улсын нийслэл Улаанбаатар хотод эсэргүүцлийн жагсаал өрнөхөд хүргээд байна.
Zindaa.mn
